Wednesday, March 14, 2012

كنت أعرفها ... و لكنها انطفأت



كنت أعرفها ... يوما ما كانت تحيا بين الغصون والأوراق في مكان متواري ... أعرفها طوال حياتها لا تحب  الصخب ... تحب ضوء الشمس الباكر الذي لا يشاركها فيه أحد .... الأضواء لا تجذبها و كذلك الزحام .. كانت تفضل عزلة علي طريقتها ..  .. تتشارك وحدتها مع قليلات من ذوات نفس التفكير ...  ثم لا تلبث أن تعود إلي دوامتها الروحية

كنت أعرفها ... نعم كان بداخلها آمال غير محدودة و طموحات أكبر من أحلامها .. كانت تمتلك قوة كبيرة و ضعفا أكبر من قوتها .. كانت تحيا معنا في هذا العالم و الكل ينظر إليها ببساطة و هي تري أنها في قمة التعقيد

كنت أعرفها ... لأصدقكم القول كانت ساذجة جدا علي الرغم من ذكائها الشديد ... حين أجلس معها كنت أشعر أنها سيدة القرارات و سيدة كل شئ و لكنها مع الأسف كانت أسيرة العاطفة التي تنهار معها قوتها فترضخ لأي من المؤثرات حولها

كنت أعرفها ... تملك أجمل زهرة في العالم .. أو هي الزهرة تملكها ... كانت لديها مشاكلها مع تلك الزهرة و لم تعرف كيف تعتني بها ... كانت دوما متخبطة معها و لربما كان هذا هو السبب الذي جعلها و جعل الزهرة في حيرة من أمرهما و فعلت لأجل الزهرة المستحيل و ضحت لأجلها بكل شئ و لكن الزهرة تركتها و رحلت بعيدا بعيدا بعيدا

كنت أعرفها ... و أعرف تطلعاتها التي كانت تمدني بالأمل لأسير جنبا إلي جنب معها ... كان القلم صديقا صدوقا لها و كانت تحب الكتابة جدا و مع الأسف أصبحت الحروف تهرب منها قبل الكلمات وأجدني الآن لا أعرفها و أصبحت غريبة عنها و أصبحَت غريبة عني وحين رأيتها اليوم وجدتها أخري أكاد لا أعرفها ... لم تعد تعرف ...هل رحيل الزهرة و قراراتها المرتبطة بها هي التي عقدت الأمور هكذا ... أم أنها أضعف مما كانت تتخيل و تتصور فأصبحت الآن تتلاشي في اللاشئ

كنت أعرفها ... و لكنني أدرك الآن أنها انطفأت

Thursday, September 30, 2010

قمرين

مريم علي اليمين و فاطمة الزهراء علي الشمال
الحياة فيها مفاجآت كتير
ساعات بتبقي وحشة ساعات بتبقي حلوة
إنما الحمد لله المرة دي المفاجأة مفاجأتين
والاتنين أحلي من بعض
و نعمتين مش عارفة أشكر ربنا عليهم إزاي
كل اللي أتمناه من ربنا إنهم يكونوا صالحتين و مصلحتين و يكونوا أحسن مني و نحقق سوا كل اللي أخَرته و كل اللي هم يتمنوه
مريم هي البنوتة الشقية اللي بتعمل دوشة و بتتحرك كتير و بتسهرني و بتطلع عيني
الزهراء دي بقي زهرة و هي فعلا بنتي الكبيرة الهادية العاقلة الرزينة
حتي لما بتجوع مش بتعيط عشان كدة براقبها كتير
وصوت عياطها رقيق جدا جدا جدا
ربنا يخليكوا ليا و يجعلكم قرة عين ليا و لباباكم

Saturday, May 15, 2010

worst feeling

The worst feeling in this world is the feeling you get when you see that you
have everything, but you feel that you have nothing

Saturday, February 20, 2010

بسرعة



أيوة بسرعة ... كله بيجي و يعدي بسرعة




ياااااااااااه ... التدوين وحشني أوي مع إن حلم إني أشوف البلوج بتاعي بيكبر راح في لحظة لما دخلت و لقيت المدونة اتمسحت




زعلت أوي عليها وقتها بس قلت عادي خير هعمل واحدة جديدة ... و فعلا عملتها بس مرتحتش




كان مكاني الحقيقي هنا في قلب يحترق ... وحسيت كدة زي ما يكون من خرج من داره اتقلّ مقداره




مع إنها كانت مدونة حلوة ... بس هنا كان المكان اللي برتاح في الكتابة فيه فعلا




و بسرعة كمان اتخطبت و بسرعة أسرع منها ماما عملت 3 عمليات و كله بسبب المرض الخبيث




و عشت أسوأ فترة في حياتي ... بس كمان تاني بسرعة اتجوزت ... و بسرعة هبقي إن شاء الله أم بعد شهور قليلة




كله كله بسرعة




بقيت أخاف من كل حاجة ... علشان كله بيجي بسرعة ... و معرفش هل يا تري اللي جه بسرعة هيمشي كمان بسرعة زي ما جه




السرعة في الأحداث دي بقت مخاوفاني أوي من كل حاجة حواليا




علي الرغم من إني المفروض أبقي عايشة أسعد فترات حياتي مع أحسن إنسان ربنا رزقني بيه




و كمان اتحققت أمنيتي الغالية بإني إن شاء الله هبقي أم




بس السرعة بقت مخوفاني ... خايفة من أي حاجة تيجي أو تمشي بسرعة




يارب ... أرجوك اشفِ أمي و بارك في عمرها




لأني بعد الشر لو مبقاش في ماما أنا هفقد احساسي بكل شئ حلو




حتي لو كنّا كتير بنختلف ... بس والله هي النور اللي موجود في حياتي




الحمد لله علي كل حال